فى حب مصر
تطويع
ح نضرب ونضرب
لكن ابدا ما نهرب
تحابنا راح نحاربك
تسالمنا يا ألف مرحب
وإذا ح تناور تلاوع
حاذر ساعات بنغضب
ما نحبش السلامة
لو السلام دا مقلب
وما ح نخافش الندامة
طول عمره النصر مطلب
ولا ح نسوق القيامة
مهما الأمانى تصعب
ولو عملت يويو
ح نجهز زمبلك لك
*
مهما عليت خيولك
ع الجحشة العارجة نركب
ومش ح نخاف نمورك
ديتها الكلب لا جرب
أنت لو جمرة قايدة
قلونا حجر ملهلب
بكيفنا يدور مدارنا
لكن فى الصعب نصعب
اللى بيمكر علينا
يلاينا مخ تعلب
والأزمة لو غريبة
تلاقيها حل أغرب
ما يفركش اللى صابنا
وحالنا اللى تلك لك
*
لو جعنا حاف بناكل
وعطشنا ملح نشرب
هزار أيوه بنضحك
ودلع نحب نلعب
لكن أما الأمر يحكم
نشيل حمول ما نتعب
وإن طال الليل علينا
بالصبر الفجر يقرب
شايلين روسنا بكفوفنا
حتى لو خدنا مقلب
وحتى لو زعيمنا
خدنا للبحر نشرب
فاحنا واثقين بانه
لو غصب عنه ناكلك